- Advertisement -
ପୁରୀ: ରଥଯାତ୍ରାକୁ ମାତ୍ର ଆଉ ୫ ଦିନ ବାକି। ହେଲେ ଏଥର ରଥଯାତ୍ରା ହେବ ନା ନାହିଁ? ତାକୁ ନେଇ ସଭିଙ୍କ ମନରେ ଦ୍ବନ୍ଦ। ଏହି ଦ୍ବନ୍ଦରେ ଆଜି ପଡିପାରେ ପୂର୍ଣ୍ଣଛେଦ । କାରଣ ସୁପ୍ରିମକୋର୍ଟରେ ହୋଇଥିବା ଆବେଦନର ଆଜି ହେବ ଶୁଣାଣି। ରଥଯାତ୍ରା ବିପକ୍ଷ ଓ ସପକ୍ଷରେ ୪ଟି ପିଟିସନର ସୁପ୍ରିମକୋର୍ଟର ଆଜି ଏକକାଳୀନ ଶୁଣାଣି ହେବ।
ରଥଯାତ୍ରା ବନ୍ଦ ପାଇଁ ଓଡିଶା ବିକାଶ ପରିଷଦର ସଭାପତି ସୁଶାନ୍ତ କୁମାର ପାଢୀ ଗତ ୧୧ ତାରିଖରେ ସୁପ୍ରିମକୋର୍ଟର ଆଇନଜୀବୀ ରଞ୍ଜିତା ରୋହତଗୀଙ୍କ ଜରିଆରେ ପିଟିସନ ଦାଖଲ କରିଥିଲେ ।ଏବେ ଦେଶରେ କରୋନା ସ୍ଥିତି ଜଟିଳ। ଦିନକୁ ଦିନକୁ ଆକ୍ରାନ୍ତ ସଂଖ୍ୟା ବଢିବାରେ ଲାଗିଛି। ଏହାକୁ ନେଇ ରଥଯାତ୍ରା ବନ୍ଦ ପାଇଁ ଆବେଦନ କରିଥିଲା ପରିଷଦ। ଆଜି ସୁପ୍ରିମକୋର୍ଟର ତିନି ଜଣିଆ ଖଣ୍ଡ ପୀଠ ଏହି ମାମଲାର ଶୁଣାଣି କରିବେ। ସୁପ୍ରିମକୋର୍ଟର ପ୍ରଧାନବିଚାରପତି ଜଷ୍ଟିସ ଏସଏ ବୋବ୍ଡେ, ଜଷ୍ଟିସ ଏଏସ ବୋପନ୍ନା ଓ ଜଷ୍ଟିସ ହୃଷିକେଶ ରାୟଙ୍କ ତିନିଜଣିଆ ଖଣ୍ଡପୀଠ ଭିଡିଓ ଜରିଆରେ ଏହି ଶୁଣାଣି କରିବେ ।
