() କୁହାଯାଏ ଦୁନିଆର ଶ୍ରେଷ୍ଠ ସମ୍ପର୍କ ହେଉଛି ରକ୍ତ ସମ୍ପର୍କ । କାରଣ ରକ୍ତ ରକ୍ତକୁ ଟାଣେ । ଖାସ ସେଥିଲାଗି ରକ୍ତ ସମ୍ପର୍କ ଯେଉଁଠି ଥାଏ କେତେବେଳେ ନାଁ କେତେବେଳେ ମଣିଷର ଦୁର୍ବଳତା ସେହି ସର୍ମ୍ପକ ପାଖରେ ରହିଯାଏ । ହେଲେ ରକ୍ତ ସମ୍ପର୍କ ଠାରୁ ଏମତିକି କିଛି ସର୍ମ୍ପକ ଅଛି ଯାହା ଆତ୍ମକୁ ଆତ୍ମ ସହିତ ଯୋଡ଼େ । ଆଉ ଏ ସମ୍ପର୍କରେ ବି ଦୁର୍ବଳତା ଏତେ ଯେ ଏହାକୁ ବି ମାପିବା ମୁସକିଲ । ଏଇ ଯେମିତି ସେଦିନ କୋଭିଡ଼ କେୟାର ହସ୍ପିଟାଲରେ ଦାସ ମଉସା ଆଉ ଚୁଲବୁଲି ମାନି ମଧ୍ୟରେ ସମ୍ପର୍କ ଯୋଡ଼ି ହୋଇଯାଇଛି ।
ଦାସ ମଉସା । ବୟସର ଅପରାହ୍ନରେ ପହଞ୍ଚିଲେଣୀ । ହଠାତ ଅଦୃଶ୍ୟ ଭୂତାଣୁରେ ସେ ଆକ୍ରାନ୍ତ ହେଲେ । ଘରେ କିଛି ଦିନ ରହିବା ପରେ ପୁଅ, ଝିଅ,ବୋଉ, ନାତି, ନାତୁଣୀ ଓ ମାଉସୀଙ୍କୁ ଛାଡି କୋଭିଡ କେୟାର ହସ୍ପିଟାଲରେ ଭର୍ତି ହେଲେ । ସେ ସେଠାକୁ ଗଲା ବେଳକୁ ଆହୁରି ୨୩ ଜଣ ରୋଗୀ ସେ ୱାର୍ଡ଼ରେ ଅଛନ୍ତି । ପ୍ରଥମଦିନ ରାତି ଚିନ୍ତାରେ କଟିଲା । ରୋଗ ଯନ୍ତ୍ରଣାର କଷ୍ଟ ସହ ମାନସିକ ଚିନ୍ତାରେ ପଡ଼ିଗଲେ ଦାସବାବୁ । ଦୁଇଦିନ ପରେ ହଠାତ ଦାସବାବୁ ୱାର୍ଡ଼ରେ ଥିବା ଅନ୍ୟମାନଙ୍କୁ ଚାହିଲେ, ଦେଖିଲେ ଯେ କେମିତି ହସ୍ପିଟାଲ ୱାର୍ଡ଼ରେ ଜୀବନ କଟୁଛି । କିଏ କେମିତି ସମୟ କାଟୁଛି । କିଏ ଏ ସବୁ ଯନ୍ତ୍ରଣାକୁ ଭୂଲି ହସ ଖୁସିରେ ସମୟ କଟୁଛି । ହଠାତ ଦାସବାବୁ ତାଙ୍କ ସମ୍ମୁଖରେ ଚିକିତ୍ସିିତ ହେଉଥିବା ଏକ ତନୁ ପତଳୀ ସୁନ୍ଦରୀ ଝିଅ ଉପରେ ନଜର ପଡ଼ିଲା । ଦାସବାବୁ ଦେଖିଲେ ଯେ ସମାନ ରୋଗରେ ପୀଡ଼ିତ ହୋଇ ସେ କେତେ ଚିନ୍ତାରେ ସମୟ କାଟୁଛନ୍ତି । ହେଲେ ମମ୍ମୁଖରେ ଥିବା ଝିଅଟି କିନ୍ତୁ ବେଶ ଖୁସିରେ ସମୟ ବିିତାଉଛି । ଗୀତ ଶୁଣୁଛି, ମୋବାଇଲରେ ଚାଟିଙ୍ଗ କରୁଛି, କାହା କାହା ସହ ଭିଡ଼ିଓ କଲିଙ୍ଗ କରୁଛି , କଥାବାର୍ତା ସମୟରେ ହସି ହସି ବେଦନ ହୋଇଯାଉଛି ଫୋନରେ । ପୁଣି କେତେବେଳେ ବହି ପଢୁଛି ତ କେତେବେଳେ ବେଡ଼ରେ ଯୋଗ କରୁଛି । ଯେମିତି ପୁରା ୨୪ ଘଣ୍ଟା ସେ ସମୟକୁ ଉପଭୋଗ କରୁଛି । ଏସବୁ ଦେଖି ଦାସବାବୁ ମନେମନେ ଭାବୁଛନ୍ତି ହଁ ବୟସ ଅଛି , ସେ ଭଲ ସମୟ କଣ ଖରାପ ସମୟ କଣ ଜାଣିପାରୁଛି କି ? ଏମିତି କେତେ କଣ ଭିନ୍ନ ଭିନ୍ନ ଚିନ୍ତା । ମଝିରେ ମଝିରେ ଝିଅଟିର ଫୋନରେ ଗପିବା ତାଙ୍କ ମନରେ ବି ବିିରକ୍ତ ଭାବ ଆଣୁଥାଏ । ହେଲେ କଣ କରିବେ ସେ । ନାଁ କିଛି କହିପାରୁଥାନ୍ତି ନା କିଛି କରିପାରୁଥାନ୍ତି । ଏମିତି ସମୟ ବିତାଉଥାନ୍ତି । ହଠାତ ଦିନେ ଦାସବାବୁ ଅପରାହ୍ନ ୫ଟା ପରେ କଣ ହେଲା କେଜାଣେ ସେ କିନ୍ତୁ ବ୍ୟାକୁଳ ହେଲେ ପରିବାର ଲୋକଙ୍କୁ ଦେଖିବା ପାଇଁ । ଆଜିର ଆଣ୍ଡ୍ରୋଏଡ଼ ଫୋନର ତ ବ୍ୟବହାର ତାକୁ ଜଣାନାହିଁ କଣ କରିବେ । ନର୍ସ କି ଡ଼ାକ୍ତର କେହି ପାଖରେ ନାହାନ୍ତି । ତେଣୁ ବାଧ୍ୟ ହୋଇ ସମ୍ମୁଖ ବେଡ଼ରେ ଚିକିତ୍ସିତ ହେଉଥିବା ତନୁ ପତଳୀ ଝିଅଟିକୁ ଡ଼ାକିଲେ । ଝିଅଟି କହିଲା ମଉସା କଣ ହେଲା ? କଣ କହୁଛନ୍ତି । ଦେହ ଭଲ ଲାଗୁନି କି ? ଏମିତି କେତେକଣ ପ୍ରଶ୍ନ କଲା । ହେଲେ ଦାସବାବୁଙ୍କ ମାତ୍ର ଗୋଟିଏ ଉତ୍ତର ଆସିଲା ତୋ ମାଉସୀକୁ ଦେଖିବା ପାଇଁ ଭାରୀଇଚ୍ଛା ହେଉଛି । କଣ କରିବି କହ । ଏଇ ଫୋନରେ କେମିତି ଦେଖିବି ଜାଣିନାହିଁ । ହେଲେ ଝିଅ ତୁ ତ ଫୋନରେ ୨୪ ଘଣ୍ଟା ଗପୁଛି ଓ ଫୋନରେ ଦେଖୁଛୁ , ତେଣୁ ମତେ ଟିକେ ଦେଖାଇ ଦିଅନ୍ତୁନି । ଝିଅଟି କହିଲା ଦିଅନ୍ତୁ ମୋଉସା ଆପଣଙ୍କ ଫୋନ । ଆପଣଙ୍କ ଫୋନରେ ସେ ସୁବିଧା ଅଛି । ମୁଁ ସିଧା ସଳଖ ଆପଣଙ୍କ ପରିବାରକୁ ଏହି ଫୋନରେ ଆପଣଙ୍କୁ ଦେଖାଇଦେବି । ଏହାକହି ଝିଅଟି ସେ ଫୋନ ନେଇ ମଉସାଙ୍କ ବଡ଼ପୁଅକୁ ଭିଡ଼ିଓ କଲ କଲା ଓ ଶେଷରେ ପାଂଚଦିନ ପରେ ମଉସା ଭିଡ଼ିଓ କଲରେ ପରିବାର ଲୋକଙ୍କୁ ଦେଖି ବେଶ ଖୁସି ହେଲେ ଆଉ ମନଇଚ୍ଛା ଗପି ଚାଳିଲେ । ଏହାପର ଠାରୁ ଦାସ ମଉସାଙ୍କ ନଜର ଓ ମନରେ ପରିବତ୍ତର୍ନ ହେଲା ଝିଅଟି ପ୍ରତି । ଝିଅଟି ବିଷୟରେ କେତେକଣ ଭାବୁଥିବା ଦାସ ମଉସାର ସର୍ମ୍ପକ ଯେମିତି ଝିଅଟିର ଆତ୍ମ ସମ୍ପର୍କ ରହିଛି ସେ କଥା ଅନୁଭବ କଲେ ଦାସ ମଉସା । ଝିଅଟି ସହ ହସଖୁସିରେ କଥା ବାର୍ତା ହେଲେ ଓ ସବୁ କଥା ସେୟାର କଲେ । ଧୀରେଧରେ ସମ୍ପର୍କ ନିବିଡ଼ ହେଲା । ଏହାରି ଭିତରେ ଡ଼ାକ୍ତର ଆସି କହିଲେ ମଉସା ଆପଣ ଏବେ ସଂପୂର୍ଣ୍ଣ ସୁସ୍ଥ । କାଲି ଆପଣ ଡ଼ିସଚାର୍ଯ୍ୟ ହେବେ । ଡ଼ାକ୍ତରଙ୍କ ଠାରୁ ଏକଥା ଶୁଣି ଦାସ ମଉସା ଖୁସି ହେଲେ ସିନା । କାଲି ସେ କଥା ଭାବିଲେ ଓ ସେ ଝିଅ କଥା ବି ଭାବିଲେ । ଡ଼ାକ୍ତର ଗଲା ପରେ ଝିଅଟି ପାଖକୁ ଯାଇ କହିଲେ ମା’ରେ ମୁଁ ସ୍ଥୁସ୍ଥ ହୋଇଗଲି , କାଲି ଘରକୁ ଯିବି । ହେଲେ ତୋ ଭଲପାଇବା ସବୁଦିନ ମନେ ରହିବ । ତୋ ସହ ରକ୍ତ ସମ୍ପର୍କ ନଥିଲେ ମଧ୍ୟ ତୁ ରକ୍ତ ସର୍ମ୍ପକ ଠାରୁ ବହୁ ଉର୍ଦ୍ଦରେ । ତୋ ନମ୍ବର ଟା ମୋ ଫୋନରେ ସେଭ କରିଦେ । ମୁଁ ଘରକୁ ଗଲେ ତୋ ସହ କଥା ହେବି । ହେଲେ ତୁ କେବେ ଯିବୁ ଡ଼ାକ୍ତର ବାବୁ କଣ କହୁଛନ୍ତି । ତୋ ଦେହ ଭଲ ଅଛି ତ ? ଏମିତି କେତେ କଣ ମଉସା ପଚାରିଲେ । ଝିଅଟିର ଗୋଟିଏ ଉତ୍ତର ମଉସା ମୁଁ ଭଲ ଅଛି । ଆଉ କିଛି ଦିନ ପରେ ମୁଁ ଠିକ ହୋଇଯିବ । ଆପଣ ଏଠାରୁ ଗଲା ପରେ ମତେ ଭୁଲିବେନି ତ । ନିଜ ପରିବାର ମାଉସୀଙ୍କୁ ପାଖରେ ପାଇଁ ମତେ କଣ ଆଉ ମନେ ରଖିବେ । ଏକଥା ଶୁଣି ମଉସାଙ୍କ ଆଖିରେ ଲୁହ ଚାଲିଆସିଲା । ମଉସାଙ୍କୁ ଦେଖି ଚୁଲବୁଲି ଝିଅଟିର ଆଖିରୁ ବି ଲୁହ ଦି଼ିଟୋପା ଝରିଗଲା । ଆଉ ମାତ୍ର ୧୫ ଦିନର ସମ୍ପର୍କ ଭିତରେ ମଉସା ଓ ଝିଅର ଲହୁ ବୁଜାଇ ଦେଲା ରକ୍ତ ସମ୍ପର୍କ ଠାରୁ ବେଳେବେଳେ ଆତ୍ମ ବା ହୃଦୟ ସମ୍ପର୍କ ବି ବହୁତ ଦରକାର । …
