()ସାବିତ୍ରୀ । ଯମଙ୍କ କବଳରୁ ସ୍ୱାମୀଙ୍କୁ ଫେରାଇ ଆଣିଥିଲେ । ମୃତ୍ୟୁମୁଖରୁ ରକ୍ଷା କରି ସତ୍ୟବାନକୁ ନୂଆ ଜୀବନ ଦେଇଥିଲେ ସାବିତ୍ରୀ । ଏହାକୁ ଅଧାର କରି ପାଳନ କରାଯାଏ ସାବିତ୍ରୀ ବ୍ରତ । ଏହି ଦିନ ଇହ କାଳ ପର କାଳର ଓ ସାତ ଜନମର ସାଥି ସ୍ୱାମୀଙ୍କ ଦୀର୍ଘାୟୁ ପାଇଁ ସାବିତ୍ରୀ ବ୍ରତ କରେ ସ୍ତ୍ରୀ । ନୂଆ ଶାଢ଼ି, ବିଭିନ୍ନ ପ୍ରକାରର ଫଳମୂଳ ଧରି ମନ୍ଦିର ଅବା ଚଉଁରା ମୂଳେ ବ୍ରତ କରେ । ପୂଜା ସାରିବା ପରେ ସ୍ୱାମୀର ଆଶୀର୍ବାଦ ନିଏ । ଯେମିତି ପ୍ରେମ ଆଗରେ ହାର ମାନିଛି ମୃତ୍ୟୁ । ହଜାର ହଜାର ବର୍ଷର ଏହି ପୁରାଣ ପରମ୍ପରା ଆଜି ବି ଜାରି ରହିଛି ।
ଆଜିର ସାବିତ୍ରୀ-ସତ୍ୟବାନ ସମ୍ପର୍କ ଟିକେ ଅଲଗା । ଯଦି ସତ୍ୟବାନ ସାବିତ୍ରୀ ବ୍ରତରେ ନୂଆ ଭଲପାଟ ଶାଢ଼ି, ଫଳମୂଳ ନ ଆଣେ, ବୁଲେଇବାକୁ ନ ନିଏ ତେବେ ସାବିତ୍ରୀ ମନ କଷ୍ଟ ହୁଏ । ମହାମାରୀ ଯୋଗୁଁ ଏଥର ସାବିତ୍ରୀ ବ୍ରତରେ କେତେକ ବ୍ୟତିକ୍ରମ ଦେଖିବାକୁ ମିଳିଛି । ମନ୍ଦିର ବନ୍ଦ ଥିବାରୁ ଅନେକ ବାଧ୍ୟ ହୋଇ ଘରେ ସାବିତ୍ରୀ ବ୍ରତ ପାଳନ କରିଛନ୍ତି । ଅନେକ ଲୁଚିଛପି ମନ୍ଦିରରେ ପାଳନ କରିଛନ୍ତି । ସ୍ୱାମୀଙ୍କୁ ମୁଣ୍ଡିଆ ମାରି ଅନେକ ନାରୀ ପ୍ରତୀକ ସାଜିଛନ୍ତି । ଲକଡ଼ାଉନ, ସଟଡ଼ାଉନ ଓ କରୋନା କାଳରେ ଅନେକ ସତୀ ସାବିତ୍ରୀ ବ୍ରତ ପାଳନ କରିଛନ୍ତି । ନିଜ ନିଜ ଢଙ୍ଗରେ । ସାବିତ୍ରୀ ବ୍ରତ ହେଉଛି ଏକ ନିଷ୍ଠା ଓ ପ୍ରେମର ବ୍ରତ । ଏଥିରେ ଥାଏ ଅର୍ଜସ୍ର ଭଲ ପାଇବା । ତାହା ସ୍ୱାମୀ ପାଖରେ ଥାଉ କି ଦୂରରେ । କିଛି ଫରକ ପକାଏ ନାହିଁ । ଏଥିଲାଗି ମନ ଓ ପ୍ରେମର ସଂଯୋଗ ଦରକାର । ଅନଲାଇନରେ ଅନେକ ସ୍ତ୍ରୀ ସାବିତ୍ରୀ ବ୍ରତ ପାଳନ କରିଛନ୍ତି । ହୁଏତ ନୂଆ ଶାଢ଼ି ନାହିଁ କି ଫଳମୂଳ ବିଭିନ୍ନ ପ୍ରକାରର ନାହିଁ । ହେଲେ ସେମାନଙ୍କ ମନରେ ରହିଛି ସ୍ୱାମୀ ପ୍ରତି ଭଲପାଇବା ଓ ପତିବ୍ରତାର ସଙ୍କଳ୍ପ । ଅନେକ ସତ୍ୟବାନ ଆଜି କରୋନା କାଳରେ ଜୀବନ ସହ ସଂଗ୍ରାମ କରୁଛନ୍ତି , ଅନେକ ସାବିତ୍ରୀ ଆଜି ଦିନରେ ସ୍ୱାମୀଙ୍କ ପ୍ରତ୍ୟକ୍ଷ କି ପରୋକ୍ଷରେ ଦେଖିପାରୁନାହାନ୍ତି , କି ଆଶୀର୍ବାଦ ନେଇପାରୁନାହାନ୍ତି । ହେଲେ ମନର ଭାବନରେ ସେମାନେ ସତ୍ୟବାନ ପ୍ରତି ସମର୍ପିତ । କିଛି ନଥାଇ ବି ସେମାନେ ମନରେ ସେମାନେ ସାବିତ୍ରୀ ବ୍ରତ ପାଳନ କରିଛନ୍ତି । କେବଳ ବିବାହିତ ନାରୀ କାହିଁକି। ଅନେକ ଅବିବାହିତ ନାରୀ ବି ଆଜି ସାବିତ୍ରୀ ବ୍ରତ ପାଳନ କରିଛନ୍ତି । ମନେ ମନେ ନିଜର ଭାବି ସ୍ୱାମୀର ଦୀର୍ଘାୟୁ କାମନା କରିଛନ୍ତି ।
କହିବାକୁ ଗଲେ ସାବିତ୍ରୀ ଓ ସତ୍ୟବାନଙ୍କ ଫଟୋ ବି ଆଜି ସୋସିଆଲ ମିଡ଼ିଆରେ କିଛି କମ ନୁହେଁ । ଭାବନା ଓ ପ୍ରେମରେ ସତ୍ୟବାନ ଓ ସାବିତ୍ରୀ ଉବୁଡ଼ୁବୁ । ପ୍ରେମ ବଳରେ ସାବିତ୍ରୀ ଯେମିତି ନିଜର ସତ୍ୟବାନର ଜୀବନ ବଞ୍ଚାଇଥିଲେ ଆଜି ସବୁ ସାବିତ୍ରୀ ମନ ଭିତରେ ସେ ଭାବନା ରଖି ବ୍ରତ ପାଳନ କରନ୍ତୁ । ତାହାକି ପ୍ରକୃତରେ ସତ୍ୟବାନ ଓ ସମାଜର ମନବଳ ବୃଦ୍ଧି କରିବ ଓ ଦୀର୍ଘାୟୁ କରିବ ।
