() ହଠାତ ଖୁସିରେ ଗଦଗଦ ହୋଇପଡ଼ିଲା ଗୁଡ଼ୁ । ଶୀତର ପହଲୀ ସଂନ୍ଧ୍ୟାରେ ଗୁଡ଼ୁର ଖୁସି ଦେଖି ତାର ସାଙ୍ଗ ପିଙ୍କୁ , ଚିଣ୍ଟୁ ପ୍ରଥମେ କିଛି ବୁଝିପାରିଲେ ନାହିଁ କି ଗୁଡ଼ୁ ନିଜେ ମଧ୍ୟ ସେ କାହିକିଁ ଖୁସି ତାହା ବି କହିଲା ନାହିଁ । ମଜାମସ୍ତି , ଖାଇପିଅ ୩ ଜଣ ବନ୍ଧୁ ନିଜ ନିଜ ଘରକୁ ଫେରିଲେ । ଅବଶ୍ୟ ପିଙ୍କୁ ଓ ଚିଣ୍ଟୁ ଫେରିବା ବେଳେ ପଚାରିଥିଲେ ଆରେ ଗୁଡ଼ୁ ତୁ କଣ ଆଜି ଏତେ ଖୁସି । ଗୁଡ଼ ଘରକୁ ଯିବା ବେଳେ ଏତିିକି କହିଥିଲା ହେ ଏମିତି ଗୋଟେ ମିଛ ଖୁସି ବୋଲି ଭାବିଦିଅ । ଏ କାହାଣୀ ମୁନା ଭାଇ ଏମବିବିଏସ ନୁହେଁ, ଡ଼ାକ୍ତର ପାଠ ନପଢି ନିଜର ବାପାମାଆ ଖୁସି ଦେବା ପାଇଁ ଡ଼ାକ୍ତର ହେବା ଓ ଡ଼ାକ୍ତରଖାନା କରିବା ପରି ସଂଜୟ ଦତ୍ତର ମିଛ ଖୁସି ନୁହେଁ । ଏ ଖୁସି ତ ଗୁଡ଼ୁର ଭିନ୍ନ ।
ଗୁଡ଼ୁ ସାଦାସିଧା ପିଲାଟିଏ । ଅଳ୍ପ ବୟସରୁ ସେ ଦୁନିଆକୁ ଜମା ଯେ ବୁଝିନି ଏକଥା କେହି ବିଶ୍ୱାସ କରିବେ ନାହିଁ ତାର ସ୍ୱଭାବ ଦେଖି । ହେଲେ ସେ ଭାରି ସରଳ ଓ ନିରମାୟା ପିଲଟି। ସହଜରେ ସବୁକିଛି ବିଶ୍ୱାସ କରିଦିଏ । ଛନ୍ଧ କପଟ ତାହା ମନରେ ନାହିଁ l ଖାଲି ଏତିିକି ସବୁ କଥାକୁ ସେ ହାଲକା ଭାବେ ନିଏ , ଜମା ସିରିୟସ ହୁଏନା କେଉଁ କଥାରେ । ନହେଲେ କଣ ସେ ଗୋଟେ ମିଛ ଖବରରେ ଏତେ ଖୁସି ହୁଅନ୍ତା ।
ମିଛ ଖବର କାହା ବିରୋଧରେ ନୁହେଁ, କି ସେ ମିଛ ଖବର କାହାର କ୍ଷତି ପାଇଁ ନୁହେଁ । କିଏ ଜଣେ ସେଦିନି ଫୋନ କରି ଗୁଡ଼ୁକୁ କାଳେ କହିଛି ଚିକୁ ଆସୁଛି ଗାଁକୁ । ବାସ ଏତିକିରେ ଗୁଡ଼ୁର ଖୁସି ନକହିଲେ ଭଲ । ଆରେ ଚିକୁ ପା ତାର ପିଲାଦିନର ବନ୍ଧୁ । ତାଙ୍କ ଘର ଗୁଡ଼ୁ ଘର ଚାଳ ବାଜେ । ପିଲାଦିନେ କେତେକଣ କଣ ସେ କରିଛନ୍ତି । ଏକାଠି ନଈରେ ଡ଼ିଆଁ ମାରି ଗାଧେଇବା, ସାଙ୍ଗ ହୋଇ କାହା ବିଲରୁ ଆମ୍ବ ପଣସ ଚୋରୀ କରିବା, ମିଶିକି ଖେଳିବା , ବୁଲିବା , ମାଛ ଧରିବା ଓ ଲୁଚିଲୁଚି ସିନେମା ଯିବା ଏମିତି କେତେ କଣ ଘଟିଛି ଉଭୟଙ୍କ ଭିତରେ। ଉଚ୍ଚଶିକ୍ଷା ଓ ରୋଜଗାର ଆଶାରେ ଚିକୁ ସିନା ବିଦେଶ ଯାଇ ବହୁତ ଦିନ ହେଲା ଘରକୁ କି ଗାଁକୁ ଆସିନାହିଁ l କି ଗଲା ଦିନଠୁ ଗୁଡ଼ୁ ସହ ଯୋଗାଯୋଗ କରିନାହିଁ । ହେଲେ ଦୁଇ ସାଙ୍ଗ ମଧ୍ୟରେ ବନ୍ଧୁତା କଣ କମିଯାଇଛି । ସେମାନେ ପାଇଁ ଏ ଯୁଗର କୃଷ୍ଣ ଓ ସୁଦାମ । ଯେଉଁଦିନ ଚିକୁ ଆସିବ ବୋଲି ଗୁଡୁ କାହାଠାରୁ ଶୁଣିଛି ସେବେ ଠାରୁ ଗୁଡ଼ୁର ଖୁସି କହିଲେ ନସରେ । ଆଉ ସେତିକି ବେଳେ କିଏ ଜଣେ ଆସି କହୁଛି ଚିକୁ ଗାଁକୁ ଆସିବନିରେ ଗୁଡ଼ି । ସେ ପା ଅଦୃଶ୍ୟ ଭୂତାଣୁରେ ପିଡ଼ିତ ହୋଇଥିଲା । ଗାଁକୁ ଆସିବ ବୋଲି ସିନା କହିଥୀଲା, ସେ ସେ ତ ଆସିଲାଣି ତାର ଶବକୁ ବି ପ୍ରଶାସନ ଗାଁକୁ ଆଣିବା ପାଇଁ ମନା କଲା । ..ଏକଥା ଶୁଣି ନିରବ ହୋଇଯାଇଥିଲା ଗୁଡୁ । ସତ ମିଛ ଖୁସି ଭିତରେ ଯେ ବଂଚିବାକୁ ପଡ଼େ ତାହା ସେ ସେଦିନ ଅନୁଭବ କରି ଚୁପ ହୋଇଯାଇଥିଲା ଚିରଦିନ ପାଇଁ…
