{ }ଲୋକମାନଙ୍କୁ ମୁଖର ଯତ୍ନ ନେବା ବିଷୟରେ ସଚେତନ କରିବା ନିମନ୍ତେ ସଭା, ପଥପ୍ରାନ୍ତ ନାଟକ, ମାଗଣା ଚିକିତ୍ସା ଓ ଅନ୍ୟାନ୍ୟ କାର୍ଯ୍ୟକ୍ରମ ମାଧ୍ୟମରେ ଶିକ୍ଷା ଓ ଅନୁସନ୍ଧାନ (ସୋଆ) ପକ୍ଷରୁ ମୁଖ ସ୍ୱାସ୍ଥ୍ୟ ଦିବସ ପାଳନ କରାଯାଇଛି । ଏହି ଅବସରରେ ରାଜଧାନୀ ଉପକଣ୍ଠ ପଳାଶପୁର ଠାରେ ଗତ ସପ୍ତାହରେ ଏକ ସ୍ୱତନ୍ତ୍ର ଶିବିର ଆୟୋଜନ କରାଯାଇଥିଲା ।
ସୋଆ ପରିଚାଳିତ ଇନ୍ଷ୍ଟିଚ୍ୟୁଟ୍ ଅଫ୍ ଡେଂଟାଲ୍ ସାଇନ୍ସେସ୍ (ଆଇଡିଏସ୍) ର ପବ୍ଲିକ୍ ହେଲ୍ଥ ଡେଂଟିଷ୍ଟ୍ରି ବିଭାଗ ଏବଂ ଏନ୍ଏସ୍ଏସ୍ ୱିଙ୍ଗ୍ ଦ୍ୱାରା ଏହି ଶିବିର ଆୟୋଜନ କରାଯାଇଥିଲା । ପ୍ରାୟ ୫୦୦ ରୁ ଊର୍ଦ୍ଧ୍ୱ ବ୍ୟକ୍ତି ମାଗଣାରେ ସ୍କ୍ରିନିଂ ଏବଂ ଚିକିତ୍ସା କରାଇଥିଲେ । ପ୍ରତ୍ୟେକ ବର୍ଷ ମାର୍ଚ୍ଚ ୨୦ ତାରିଖରେ ବିଶ୍ୱ ମୁଖ ସ୍ୱାସ୍ଥ୍ୟ ଦିବସ ପାଳନ କରାଯାଇଥାଏ । ଆଇଡିଏସ୍ ଡିନ୍ ପ୍ରଫେସର ନୀତା ମହାନ୍ତିଙ୍କ ତତ୍ୱାବଧାନରେ ଛାତ୍ରଛାତ୍ରୀମାନେ ଦୀର୍ଘ ୧୦ ଦିନ ଧରି ପୃଥକ ପୃଥକ ଭାବେ ମୁଖର ସ୍ୱାସ୍ଥ୍ୟ ସମ୍ପର୍କରେ ଲୋକମାନଙ୍କୁ ପରାମର୍ଶ ଦେବା ସହ ଏ ସମ୍ପର୍କିତ ଲିଫ୍ଲେଟ୍ ବଂଟନ କରିଥିଲେ । ଗୁଟ୍କା, ତମାଖୁ ଓ ସିଗାରେଟ ଖାଇବା ଦ୍ୱାରା କିଭଳି ସ୍ୱାସ୍ଥ୍ୟ ଉପରେ ଖରାପ ପ୍ରଭାବ ପକାଉଛି ସେ ନେଇ ପଥପ୍ରାନ୍ତ ନାଟକ ମାଧ୍ୟମରେ ସଚେତନ କରାଯାଇଥିଲା । ସେହିପରି ପବ୍ଲିକ୍ ହେଲ୍ଥ ଡେଂଟିଷ୍ଟ୍ରି ବିଭାଗର ଦୁଇ ପିଜି ଛାତ୍ରୀ ଡାକ୍ତର ଉପାସନା ଧର ଏବଂ ଡାକ୍ତର ମାର୍ଲିନ୍ ଜେନା ମୁଖର ସ୍ୱାସ୍ଥ୍ୟ ନେବା ବିଷୟରେ ବକ୍ତବ୍ୟ ରଖିଥିଲେ । ସେହିପରି ଏନ୍ଏସ୍ଏସ୍ର କୋର୍ଡିନେଟର ପ୍ରଫେସର ନଚିକେତା ଶର୍ମା ଏନ୍ଏସ୍ଏସ୍ର କାର୍ଯ୍ୟ ସମ୍ପର୍କରେ ତଥ୍ୟ ରଖିଥିଲେ । ଆଇଡିଏସ୍ ନୁକଡ ଟିମ୍ ଦ୍ୱାରା ଏକ ନାଟକ ପରିବେଷଣ କରାଯାଇଥିବା ବେଳେ ଏହି ଅବସରରେ ଡାକ୍ତର ରାଧା ଦଳେଇ ଏବଂ ଡାକ୍ତର ସୁଦୀପ୍ତାଙ୍କୁ ସମ୍ବର୍ଦ୍ଧିତ କରାଯାଇଥିଲା । ସେହିପରି ୯୦.୪ ଭଏସ୍ ଅଫ୍ ସୋଆ କମ୍ୟୁନିଟି ରେଡିଓରେ ଆଇଡିଏସ୍ର ସିନିୟର ଫ୍ୟାକଲ୍ଟି ଡାକ୍ତର ସ୍ୱାଗତିକା ପଣ୍ଡା, ଡାକ୍ତର ସୌରଭ ପଣ୍ଡା ଏବଂ ଡାକ୍ତର ଅନୁରାଗ ଶତପଥୀ ମୁଖର ସ୍ୱାସ୍ଥ୍ୟ ନେଇଉପଦେଶ ପ୍ରଦାନ କରିଥିବା ବେଳେ ଏକ ଘରୋଇ ଟିଭି ଚ୍ୟାନେଲ୍ରେ ମାର୍ଚ୍ଚ ୨୦ ତାରିଖରେ “ଏ ହେଲ୍ଦି ମାଉଥ ଫର୍ ଏ ହେଲ୍ଦି ବଡି” ଶୀର୍ଷକ ଏକ କାର୍ଯ୍ୟକ୍ରମରେ ଅଂଶ ଗ୍ରହଣ କରି ତଥ୍ୟ ଉପସ୍ଥାପନା କରିଥିଲେ । ଆଇଡିଏସ୍ ହେଉଛି ପୂର୍ବ ଭାରତର ଏକ ମାତ୍ର ଦନ୍ତ ସ୍ୱାସ୍ଥ୍ୟ ଅନୁଷ୍ଠାନ ଯାହାକି କୋକ୍ରେନ୍ ଦ୍ୱାରା ସ୍ୱୀକୃତି
ପ୍ରାପ୍ତ ବୋଲି ପ୍ରଫେସର ମହାନ୍ତି କହିଛନ୍ତି ।
