() ସମ୍ପର୍କ ସବୁବେଳେ ମଧୁର l ଯେବେ ମଣିଷର ଦୃଷ୍ଟିଭଙ୍ଗୀ ବଦଳିଯାଏ ସେ ସମୟରୁ ସମ୍ପର୍କ ରେ ଚାଲିଆସେ ଅଦିନିଆ ଭଟ୍ଟା l ବର୍ଷ ବର୍ଷର ଭଲ ପାଇବା ଏହି ଭଟ୍ଟା ଭିତରେ ଉଭାନ୍ ହୋଇଯାଏ l ଥରେ ଭାବନ୍ତୁ କାହିଁକି ଏଭଳି ପରିସ୍ଥିତି ମଣିଷ ସାମ୍ନା କରେ , ଉତ୍ତର ଆପେ ଆପେ ମିଳିଯିବ l ସଂପର୍କରେ ସ୍ଵାର୍ଥ ତାସ୍-ଘର ପରି ଭାଙ୍ଗି ଦିଏ ଅନେକ କିଛି ଆପଣା ଓ ଭଲ ପାଇବା l ସ୍ମୃତି ସବୁ ଅତୀତର ଗ୍ରନ୍ଥ ପରି ଉଈ ଖାଇଯାଏ l ଯାହାକୁ ଚାହିଁଲେ ବି ସାଇତି ରଖିବା କଷ୍ଟକର ବ୍ୟାପାର l ଭାବିବାକୁ ବହୁତ ସମୟ ଥିଲେ ସୁଦ୍ଧା ସେ ସମ୍ପର୍କ କିନ୍ତୁ ଆପେ ଆପେ ଏତେ ଅତୀତ ହୋଇଯାଏ ଯେ ଆମ ଜୀବନରେ ତାହା ଆଉ ଭାବନାକୁ ଆସେନା l ଆଉ ଯଦି ଆସେ ତେବେ ତାହା ଜୀବନଚକ୍ରରେ ବାଧା ସୃଷ୍ଟି କରେ l ତେଣୁ ସମ୍ପର୍କ ଗଢ଼ିବା ଅପେକ୍ଷା ସମ୍ପର୍କକୁ ବଜାୟ ରଖିବା ଆଜିର ସ୍ୱାର୍ଥପର ଦୁନିଆରେ କାଠିକର ପାଠ l ଅନେକ ତ ସ୍ବପ୍ନର ରାଇଜରେ ହଜିବା ପରି ସମ୍ପର୍କ ଗଢନ୍ତି କେବଳ ସ୍ଵାର୍ଥ ହାସଲ କରିବା ପାଇଁ l ଯେମିତି ଫୁଲରୁ ମଧୁ ସଂଗ୍ରହ କରିବା ପରେ ଭଅଁର ଉଡ଼ିଯାଏ, ଠିକ୍ ସେହିପରି ଦୁନିଆରେ ବହୁ ଲୋକ ସ୍ବାର୍ଥ ହାସଲ ପରେ ସମ୍ପର୍କକୁ ଭୁଲି ଯାଆନ୍ତି l ସମ୍ପର୍କ ମଜବୁତ କରିବା ଓ ବଞ୍ଚାଇ ରଖିବାରେ ଯେଉଁମାନେ ସଫଳ ହୋଇଛନ୍ତି, ସେମାନଙ୍କ ମଧ୍ୟରେ ନା ଥାଏ ସ୍ଵାର୍ଥ ନା କିଛି ପାଇବାର ଆଶା l ଯେଉଁଥି ପାଇଁ ଚିରସ୍ଥାୟୀ ହୋଇ ରହିଥାଏ ସେ ସମ୍ପର୍କ l ସମ୍ପର୍କରେ ରାଗ, ଗର୍ବ, ସ୍ଵାର୍ଥ କୁ ଯିଏ ଯେତେ ଦୁରେଇ ପାରିବ ସେ ସମ୍ପର୍କ ହୁଏ ସେତେ ମଜବୁତ୍ ଓ ଦୀର୍ଘସ୍ଥାୟୀ l ସମୟ ନୁହେଁ ବରଂ ମାନବିକତା ଓ ଭଲ ପାଇବା ସମ୍ପର୍କ ସେତୁର ମଜବୁତ ସ୍ତମ୍ଭ l ଗଭୀର ସମ୍ପର୍କ ପାଇବା ନୁହେଁ, ବରଂ ହରାଇବା ପାଇଁ ସଦା ପ୍ରସ୍ତୁତ ନୁହେଁ l
ଆଜିର ଦୁନିଆରେ କିନ୍ତୁ ସମ୍ପର୍କ ର ପରିଭାଷା ବଦଳି ଯାଇଛି l ରକ୍ତର ସମ୍ପର୍କ ପର ହେଉଛି, ଅଚିହ୍ନା ବ୍ୟକ୍ତି ରକ୍ତ ସମ୍ପର୍କ ଠାରୁ ଅଧିକ ହୋଇପଡୁଛି l ଜନ୍ମ କଲା ବାପା, ମା କୁ ପୁଅ ଓ ଝିଅ ବୟସର ଅପରାହ୍ନରେ ରାସ୍ତାରେ ଛାଡି ଦେଉଛନ୍ତି ତ ଆଉ କେଉଁଠି ଜନ୍ମ କଲା ଶିଶୁକୁ ବାପା ଓ ମାଆ ମାରିଦେଉଛନ୍ତି ଅଥବା ଅଳିଆ ଗଦାରେ ଫିଙ୍ଗି ଦେଉଛନ୍ତି l ସେମିତି ଜମି ଓ ଟଙ୍କା ପାଇଁ ମା ପେଟର ଭାଇକୁ ଟାଙ୍ଗିଆରେ ହାଣି ହତ୍ୟା କରୁଛି ଭାଇ l ଯୌନ ପିପାସୁ ବହୁ ଲୋକ ଭଲ ପାଇବାର ବଡ ସମ୍ପର୍କକୁ କିଛି ମିନିଟ୍ ରେ ଜାଳିପୋଡି ଛାରଖାର କରି ଦେଉଛନ୍ତି l ଏମିତି ଅନେକ ଉଦାହରଣ ଦେଖିବାକୁ ମିଳୁଛି ସମାଜରେ l ଆଉ ଏସବୁର ମୁଖ୍ୟ କାରଣ ହେଉଛି ସମ୍ପର୍କ ଭିତରେ ସ୍ବାର୍ଥର ଆବେଗ ବଢିବା l ବ୍ୟତିକ୍ରମ୍ ପାଇଁ ଆମେ ନିଜେ ହିଁ ଦାୟୀ l ତେଣୁ ଚିନ୍ତା, ଚେତନା ନୁହେଁ, ବରଂ ବଡ ସମ୍ପର୍କରେ ବଡ ହୃଦୟ ସୃଷ୍ଟି କରିବା ଚାଲ l ଯେମିତି ସେଦିନ ଥିଲା, ସବୁ ଦିନ ସେପରି ରହିବ l କେବଳ ସମ୍ପର୍କ ଜଣା ଓ ଅଜଣା କଥା ଟିକେ ବୁଝିବା ଦରକାର l
