() ଆଜି ହେଉଛି ଆଶ୍ବିନ ମାସର ଶେଷ ଦିନ ପୂର୍ଣ୍ଣମୀ ତିଥି। କାଲିଠାରୁ ଆରମ୍ଭ ହେବ ପବିତ୍ର ମାସ କାର୍ତ୍ତିକ । ଆଜିର ଦିନକୁ କୁଆଁରୀ ଝିଅମାନେ କୁମାର ପୂର୍ଣ୍ଣିମା ଭାବରେ ପାଳନ କରିଥାଆନ୍ତି ।ଏହାକୁ ଓଡିଶାର କୁଆଁରୀ ଝିଅ ମାନଙ୍କ ଏକ ଗଣପର୍ବ କହିଲେ ଅତ୍ଯୁକ୍ତି ହେବ ନାହିଁ। କାରଣ ସାରା ଓଡିଶାରେ ଏହି ଦିନଟିକୁ କୁଆଁରୀ ଝିଅ ମାନେ ବହୁ ଆଡମ୍ବର ସହକାରେ ପାଳନ କରିଥାନ୍ତି । କିନ୍ତୁ ଏହାର ରହିଛି କିଛି ବୈଚିତ୍ରତା । କିଛି ସ୍ଥାନରେ ଏହାକୁ କୁମାର ପୂର୍ଣ୍ଣିମା ଭାବେ ପାଳନ କରାଯାଉଥିବା ବେଳେ ଦକ୍ଷିଣ ଓଡିଶା ଓ ପଶ୍ଚିମ ଓଡିଶାର କିଛି ଅଂଶରେ ଆଜିର ଦିନକୁ ଜହ୍ନି ଓଷା ରୂପେ ପାଳନ କରାଯାଏ। 
ଉତ୍ତର ଓ ପୂର୍ବ ଓଡିଶାର କୁଆଁରୀ ଝିଅମାନେ ପୂର୍ଣ୍ଣମୀର ପାଞ୍ଚ ଦିନ ପୂର୍ବରୁ ଏହାର ପ୍ରସ୍ତୁତି ପୂର୍ବକ ସତ୍ତ୍ବିକ ରହି ପାଳନ କରୁଥିବା ସ୍ଥଳେ ଦକ୍ଷିଣ ଓ ପଶ୍ଚିମ ଓଡିଶାର ଝିଅମାନେ ଦୀର୍ଘ ଏକ ମାସ ପୂର୍ବରୁ ସାତ୍ତ୍ଵିକ ରହି ଆଜି ଦିନରେ ଏହାର ପୂର୍ଣ୍ଣାହୂତି ଦିଅନ୍ତି । ବିଶ୍ୱାସ ରହିଛି କାଳେ ଏହି ଓଷା କଲେ କୁଆଁରୀ ଝିଅମାନେ ମନଲାଖୀ ବର ପାଇଥାନ୍ତି । କିନ୍ତୁ ଲୋକକଥା ଅନୁଯାୟୀ ଏହି ଓଷା, ଝିଅମାନେ ନିଜ ଭାଇମାନଙ୍କ ଶୁଭ ମନାଷୀ କରିଥାନ୍ତି । ତେବେ ସିଏ ଯାହା ହେଉନା କାହିଁ, ଏହା ଓଡିଆ ଘରର ଏକ ପ୍ରାଚୀନ ପରମ୍ପରା । ଆଜି ଦିନରେ କୁଆଁରୀ ଝିଅ ମାନେ ଉପବାସ ରହି ସନ୍ଧ୍ୟାରେ ଏକାଠି ହୋଇ ବିଭିନ୍ନ ପ୍ରକାର ଫୁଲରେ ଚଉଁରା ମୂଳ ସଜାନ୍ତି ତା ସହ ଖଇଚା ଉଖୁଡା ନଡିଆ କଦଳୀ ତଥା ବିଭିନ୍ନ ପ୍ରକାର ଭୋଗ ସହ ପୂଜା କରି ଦୀପ ଧୂପରେ ଚାନ୍ଦ ବନ୍ଦାନ୍ତି । 
ଶେଷରେ ଜହ୍ନ କୁ ନୈବେଦ୍ଯ ଅର୍ପଣ କରି ନିଜ ଓଷା ପୂର୍ଣ୍ଣ କରନ୍ତି । କିନ୍ତୁ କରୋନା କାରଣରୁ ଧୀରେ ଧୀରେ ଏହା ଫିକା ପଡିବାକୁ ବସିଲାଣି । ବିଗତ ବର୍ଷ ମାନଙ୍କ ଭଳି ଆଉ ସେ ଜାକ ଜମକ ଦେଖିବାକୁ ମିଳୁ ନାହିଁ। କେବଳ ପରମ୍ପରା ବଞ୍ଚାଇବାକୁ ଏହା ପାଳନ କରାଯାଉଛି ।
