ଭୁବନେଶ୍ୱର:ଏବେ ରାଜ୍ୟ ମହାମାରୀ କରୋନା ସହ ଲଢ଼ୁଛି । ହେଲେ ଏହି ସମୟରେ ଆଉ ଏକ ପ୍ରାକୃତିକ ବିପର୍ଯ୍ୟୟ ରାଜ୍ୟବାସୀ ଓ ସରକାର ସାମ୍ନା କରିବାକୁ ଯାଉଛନ୍ତି । ଏହା ହେଉଛି ସାମୁଦ୍ରିକ ଝଡ଼ ଅମ୍ପାନ। ଏହାକୁ ମୁକାବିଲା କରିବାକୁ ସରକାର ମଧ୍ୟ ସମସ୍ତ ପ୍ରସ୍ତୁତି କରିସାରିଲେଣି । କାରଣ ଏପରି ବିପର୍ଯ୍ୟୟ ଓଡିଶା ପୂର୍ବରୁ ମଧ୍ୟ ସାମ୍ନା କରିଛି। ଆଉ ମୁଖ୍ୟମନ୍ତ୍ରୀଙ୍କ ସୁପରିଚାଳନା ପାଇଁ ସବୁଠି ପ୍ରସଂଶା ସାଉଁଟିଛି। ଏଥର ମଧ୍ୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଜିରୋ କାଜୁଆଲିଟିକୁ ଗୁରୁତ୍ୱ ଦେଇଛନ୍ତି । ସେଇ ଅନୁସାରେ ପ୍ରଶାସନିକ ସ୍ତରରେ ସଜାଗ ଓ ତତ୍ପରତା ପ୍ରକାଶ ପାଇଛି। ମନ୍ତ୍ରୀ ଓ ନେତାମାନେ ମଧ୍ୟ ଅମ୍ପାନ ମୁକାବିଲା ପାଇଁ ପ୍ରସ୍ତୁତି ଜୋରଦାର କରିଛନ୍ତି। ଓଡ଼ିଶାର କ୍ରାଇସିସ ମ୍ୟାନେଜର ତଥା ବିଜେଡି ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସ (ବବି) ମଧ୍ୟ ଅମ୍ପାନ ମୁକାବିଲା ପାଇଁ ଅଣ୍ଟା ଭିଡିଛନ୍ତି। ନିଜ କଠିନ ପରିଶ୍ରମ ପାଇଁ ନବୀନଙ୍କ ପ୍ରିୟ ପାତ୍ର ସାଜିଥିବା ପ୍ରଣବ ଏବେ ଅମ୍ପାନ ମୁକାବିଲା ପାଇଁ ସମୀକ୍ଷା କରୁଛନ୍ତି । ଦଳୀୟ ଓ ପ୍ରଶାସନିକ ସ୍ତରରେ ବାତ୍ୟା ମୁକାବିଲା ପାଇଁ ପ୍ରଚେଷ୍ଟା ଜାରୀ ରଖିଛନ୍ତି। ଘୁର୍ଣ୍ଣି ଝଡ଼ର ରୂପ ନେଇଥିବା ଅମ୍ପାନ ବୁଧବାର ଦୀଘା ଓ ହାତିଆ ମଧ୍ୟବର୍ତ୍ତୀ ଅଞ୍ଚଳରେ ସ୍ଥଳ ଭାଗକୁ ଛୁଇଁବା ସମ୍ଭାବନା ଅଛି। ପ୍ରଭାବିତ ଅଞ୍ଚଳରୁ ଲୋକଙ୍କୁ ସ୍ଥାନାନ୍ତର କରିବା ପାଇଁ ଲାଗିପଡିଛନ୍ତି ଲୋକେ । ଜିଲ୍ଲା ସ୍ତରରେ ଜିଲ୍ଲା ପ୍ରଶାସନକୁ ସ୍ଥାନୀୟ ନେତା ଓ ବିଧାୟକ କିପରି ସହଯୋଗ କରିବେ ତା ଉପରେ ଗୁରୁତ୍ୱ ଦେଇଛନ୍ତି ପ୍ରଣବ। ତେବେ ରାଜନୈତିକ ଗୋଟି ଚାଳନା ହେଉ କି ପ୍ରାକୃତିକ ବିପର୍ଯ୍ୟୟ ସବୁଥିରେ ପ୍ରଣବ ସକ୍ରିୟ ଭୂମିକା ନେଇ କାମ କରନ୍ତି। ସେଥିପାଇଁ ତ ତାଙ୍କୁ ବିପଦର ସାଥି କହନ୍ତି ଲୋକେ।
