() ସବୁ କଟକଣା ହଟିବାରେ ପରେ ଏଥର ସ୍ବାଭାବିକ ଭାବେ ଚାଲିବ ବିଧାନସଭା । ନଭେମ୍ବର ୨୪ରୁ ଡ଼ିସେମ୍ବର ୩୧ । ବିଧାନସଭାର ଲମ୍ବା ସମୟର ଶୀତ ଅଧିବେଶନ । ଅଧିବେଶନ ପୂର୍ବରୁ ଦୁଇ ବିରୋଧି ବିଜେପି ଓ କଂଗ୍ରେସ ବିଧାୟକ ଦଳ ବୈଠକ ବସି ରଣନୀତି ପ୍ରସ୍ତୁତ କରିଛନ୍ତି । ମୁଖ୍ୟ ବିରୋଧୀ ବିଜେପି ଚିରାଚରିତ ଢଙ୍ଗରେ ବହୁ ପୁରୁଣା ଓ ନୂଆ ପ୍ରସଙ୍ଗକୁ ନେଇ ଗୃହକୁ ଆସିବ । ଚାଷୀ, ଦୁର୍ନୀତି,ବଜେଟ ଅର୍ଥ ଖର୍ଚ୍ଚ ନହେବା ଆଦି ପ୍ରସସଙ୍ଗକୁ ଗୃହରେ ଉଠାଇବ ବିଜେପି । ଏହାକୁ ନେଇ ବିଧାୟକ ଦଳ ବୈଠକରେ ରଣନୀତି ପ୍ରସ୍ତୁତ କରାଯାଇଛି । ସେହିପରି କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ରଙ୍କ ଅଧ୍ୟକ୍ଷତାରେ କଂଗ୍ରେସ ବିଧାୟକ ଦଳ ବୈଠକରେ ଦଳ ଉଭୟ ବିଜେଡ଼ି ଓ ବିଜେପିକୁ ଘେରିବାକୁ ରଣନୀତି କରିଛି । ସମାନ ପ୍ରସଙ୍ଗ ସହ କେନ୍ଦ୍ର ଅବେହଳା, ଆଇନ ଶୃଙ୍ଖଳା , ଚାଷୀ, ବେକାରୀ ପରି ସମସ୍ୟା ଦଳ ଗୃହରେ ଉଠାଇବାକୁ ରଣନୀତି ପ୍ରସ୍ତୁତ କରିଛି ।
ଅନ୍ୟପଟେ ଆସନ୍ତା କାଲି ୧୦ଟା ୩୦ ମିନିଟରେ ବିଧାନସଭାର ୫୪ ନମ୍ବର ପ୍ରକୋଷ୍ଠରେ ବିଜେଡ଼ି ବିଧାୟକ ଦଳ ବୈଠକ ବସିବ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ବସିବାକୁ ଥିବା ଏହି ବୈଠକରେ ଦଳ ଗୃହରେ କେଉଁ ପ୍ରସଙ୍ଗ ଉଠାଇବ ଓ ବିରୋଧୀଙ୍କ ସବୁ ଅଭିଯୋଗର ଆଲୋଚନା ମାଧ୍ୟମରେ କିପରି ଜବାବ ଦିଆଯିବ ତାହା ଉପରେ ଆଲୋଚନା ହେବ । ବିଭିନ୍ନ କ୍ଷେତ୍ରରେ ଲଗାତର ଭାବେ ଓଡ଼ିଶାକୁ କେନ୍ଦ୍ର ଯେପରି ଅବହେଳା କରୁଛି ଏ ପ୍ରସଙ୍ଗ ଶାସକ ବିଜେଡ଼ି ଗୃହରେ ଉଠାଇ ରାଜ୍ୟପାଇଁ ହକ ମାଗିବ ବୋଲି ସରକାରୀ ଦଳ ମୁଖ୍ୟ ସଚେତକ ପ୍ରଶାନ୍ତ ମୁଦୁଲି କହିଛନ୍ତି ।
ଅଢେତ ବର୍ଷ ପରେ ସମସ୍ତ କଟକଣା ଉଠିବା ପରେ ବିଧାୟକମାନେ ନିଜ ନିଜ ଆସନରେ ବସିବା ସହ ପ୍ରେସ ଗ୍ୟାଲେରୀରେ ସାମ୍ବାଦିକମାନଙ୍କୁ ପୂର୍ବପରି ବସି ଖବର ପରିବେଷଣ କରିବେ । ପ୍ରଥମ ଦିନ ୨୦୨୨-୨୩ ଆର୍ଥିକ ବର୍ଷର ଅତିରିକ୍ତ ବଜେଟ ଉପସ୍ଥାପିତ ହେବ ।
