ବ୍ୟାସନଗର :ଇତିମଧ୍ୟରେ ନଭେଲ୍ କରୋନା ପାଇଁ ପ୍ରଥମ ପର୍ଯ୍ୟାୟ ଲକଡାଉନ୍ ଶେଷ ହୋଇଥିବା ବେଳେ ଦ୍ବିତୀୟ ପର୍ଯ୍ୟାୟ ଲକଡାଉନ୍ ଚାଲୁ ରହିଛି ।ତେଣୁ ବ୍ୟାସନଗର ଅଞ୍ଚଳରେ ପୋଲିସ ବାହିନୀର କାର୍ଯ୍ୟଭାର ବଢି ଚାଲିଛି । ଜିଲ୍ଲା ପ୍ରଶାସନର ନିୟମକୁ ପାଳନ କରୁନଥିବା ବ୍ଯକ୍ତି ଓ ବାଣିଜ୍ୟିକ ପ୍ରତିଷ୍ଠାନ ଗୁଡିକ ଉପରେ ତୀକ୍ଷଣ ନଜର ରଖିଛି ପୋଲିସ୍ ।ସେଥି ସହ ଅମାନିଆ ଗାଡି ଚାଳକଙ୍କୁ ମଧ୍ୟ ପ୍ରତ୍ୟେକ ଦିନ ସାବାଡ୍ କରୁଛି । କିନ୍ତୁ ବିଡମ୍ବନାର ବିଷୟ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ ସତ୍ତ୍ୱେ ସୁଧୁରୁ ନାହାନ୍ତି ଅମାନିଆ ।ମିଳିଥିବା ସୂଚନା ଅନୁଯାୟୀ ଆଜି ଲକଡାଉନ୍ ନିୟମକୁ ଉଲଙ୍ଘନ କରିଥିବାରୁ ୬୧ଟି ଦୁଇ ଚକିଆ ଓ ୩ଟି ଚାରି ଚକିଆକୁ ଜବତ କରାଯାଇ ୨୧୦୦୦ଟଙ୍କା ଜୋରିମାନା ସହ,ମାସ୍କ୍ ବାବଦରେ ୧୬୦୦ଟଙ୍କା ଆଦାୟ କରାଯାଇଛି ।ଏଥି ସହ ଯାଜପୁର ରୋଡ ଥାନା ଅଧିକାରୀ ଶ୍ରୀ ଅନିଲ୍ କୁମାର ମହାନ୍ତି ବିଭିନ୍ନ ବ୍ଯାଙ୍କ୍ ସାମନାରେ ଧାଡିରେ ଛିଡାହୋଇଥିବା ଗ୍ରାହକଙ୍କୁ ସୁରକ୍ଷା ମାସ୍କ୍ ପ୍ରଦାନ କରିଥିଲେ ।ଏଠାରେ ଉଲ୍ଲେଖ କରାଯାଇପାରେ ବିଗତ କିଛି ଦିନ ତଳେ ଏହି ପୋଲିସ୍ ପକ୍ଷରୁ ବିଭିନ୍ନ ଅଞ୍ଚଳରେ ଥିବା ଦୀନ ଦୁଃଖୀ ମାନଙ୍କୁ ଖାଦ୍ୟ ପଦାର୍ଥ ବାଣ୍ଟିବା ନଜରକୁ ଆସିଥିଲା । ପୋଲିସର ଏପରି କାର୍ଯ୍ୟକଳାପକୁ ସାଧାରଣରେ ପ୍ରସଂଶା କରାଯାଇଛି ।କିଛି ବୁଦ୍ଧିଜିବୀଙ୍କ ମତ ଅନୁସାରେ ପୋଲିସ୍ ଅସହାୟଙ୍କ ପ୍ରତି ଉଦାର ଓ ଅମାନିଆଙ୍କ ପ୍ରତି କଠୋର ହେଉଛି,ଯାହା ଏକ ପ୍ରଶଂସନୀୟ କାର୍ଯ୍ୟ ।
