ସରକାରଙ୍କ ହସ୍ତକ୍ଷେପ ଲୋଡିଲେ କର୍ମଚାରୀ

କଳିଙ୍ଗନଗର  : ରାଷ୍ଟ୍ରାୟତ୍ତ ଉଦ୍ୟୋଗ ନୀଳାଚଳ ଇସ୍ପାତ ନିଗମ ରେ ଗତ କିଛି ମାସ ହେବ ଚାଲିଥିବା ଅଚଳାବସ୍ଥାକୁ ପାଇଁ ଆଜି କିଛି କର୍ମଚାରୀ ଶାନ୍ତିପୂର୍ଣ ବିକ୍ଷୋଭ ପ୍ରଦର୍ଶନ କରିଥିଲେ । ପ୍ରାପ୍ତ ସୂଚନା ଅନୁଯାୟୀ କଞ୍ଚାମାଲ ଅଭାବରୁ ଗତ ଜୁଲାଇ ୨୬ତାରିଖରେ ନୀଳାଚଳ ଇସ୍ପାତ ନିଗମ ର ବ୍ଲାଷ୍ଟ୍ ଫରନେସ୍ ରୁ ଉତ୍ପାଦନ ବନ୍ଦ ରହିଛି । ଏପରି ସ୍ଥଳେ ଦିନକୁ ଦିନ କ୍ରମଶଃ ଗୋଟିଏ ପରେ ଗୋଟିଏ ୟୁନିଟ୍ ବନ୍ଦ ହେବାକୁ ବସିଲାଣି । ଏହି କାରଣରୁ କିଛି କର୍ମଚାରୀଙ୍କ ମିଳିତ ଉଦ୍ୟମରେ ଶତାଧିକ କର୍ମଚାରୀ ହାତରେ ପ୍ଲାକାଡ୍ ଧରି ପ୍ଲାଣ୍ଟ ସମ୍ମୁଖ ଗେଟ୍ ଆଗରେ ଧାରଣା ଦେଇଥିଲେ । ଧାରଣା ରତ କର୍ମଚାରୀଙ୍କ ଆଭିମୁଖ୍ଯ ବିଜୁ ବାବୁଙ୍କ ସ୍ବପ୍ନ ବୋଲାଉଥିବା ନୀଳାଚଳ ଇସ୍ପାତ ନିଗମ କୁ ସେଲ୍ କିମ୍ବା ଆର୍ ଆଇ ଏନ୍ ଏଲ୍  ସହ ମିଶ୍ରଣ , କୋଇଡାଠାରେ  ଥିବା ନିଜସ୍ୱ ଖଣିକୁ ଯଥା ଶୀଘ୍ର ଚାଲୁ କରିବା , ଏସିଆ ମହାଦେଶରେ ସୁନାମ ଅର୍ଜନ କରିଥିବା ଏକମାତ୍ର ରାଷ୍ଟ୍ରାୟତ୍ତ ଉଦ୍ଯୋଗକୁ କୌଣସି ବେସରକାରୀ ସଂସ୍ଥାକୁ ନଦେବା  ।ଏଠାରେ ଉଲ୍ଲେଖ କରାଯାଇପାରେ ଯେ ଯଦି ଏହିପରି ଭାବେ ଅଚଳାବସ୍ଥା ଚାଲୁରହେ ତେବେ କାରଖାନାରେ କାମ କରୁଥିବା ପ୍ରାୟ ୧୦ହଜାର କର୍ମଚାରୀ ଜୀବିକା ହରାଇବେ । ତେଣୁ କର୍ମଚାରୀ ଓ ତାଙ୍କ ପରିବାରର ଦୁଃଖ ଦୁର୍ଦ୍ଦଶା ଦୂରୀକରଣ ପାଇଁ ସରକାର ଯଥାଶୀଘ୍ର  ପଦକ୍ଷେପ ନେବା ପାଇଁ ନିବେଦନ କରିଛନ୍ତି । ଯଦି ସରକାର ଆଗାମୀ ଦିନରେ କାରଖାନାର ଉଦ୍ଧାର ପାଇଁ କୌଣସି ପଦକ୍ଷେପ ନ ନିଅନ୍ତି ତେବେ ଆଗାମୀ ଦିନରେ ସପରିବାରେ ରାଜରାସ୍ତାକୁ ଓଲ୍ହାଇବାକୁ ନିଷ୍ପତ୍ତି ନେଇଛନ୍ତି ।